Vieiros

O mércores 6 reuniranse en Bruxelas tres artistas galegas da man da Consellaría de Cultura. Guadi Galego, Uxía e Verónica Codesal, esta última residente en Bélxica, ofrecerán o espectáculo Ida e volta coa música de Didier Laloy, Pascal Chardome, Cédric Waterschoot e Osvaldo Hernández.

O encontro coa cultura do país na capital belga combinará as composicións do trío Ad Cominotto e mais as voces das tres cantantes galegas. Verónica Codesal amosará a súa experiencia nos grupos Ialma e Urban Trad; Uxía demostrará a súa ampla traxectoria que a converteu nunha das voces máis internacionais da música galega, mentres que Guadi Galego achegará a súa arte como voz de Berrogüetto, intérprete de Espido e integrante de Nordestin@s.

O espectáculo contará co son do acordeón diatónico de Laloy, a guitarra de Chardome, o baixo de Waterschoot e a percusión de Hernández. O proxecto foi ideado por Muziekpublique coa colaboración da Consellaría de Cultura, e ten vontade de se repetir noutros lugares.