Vieiros

A Enquisa de Poboación Activa (EPA) publicada este venres, tal e como se adiantou por erro o pasado martes, deparan uns datos moi negativos para Galiza. O paro medrou no primeiro trimestre de 2010 un 19,15%, a porcentaxe máis elevada de todo o Estado Español e moi por enriba da media estatal (6,61%). A estatística xa supera a día de hoxe as previsións que tiña a Xunta de Galiza para finais de ano.

A taxa de paro sitúase agora no 15,46%, é dicir, de cada 100 galegos en idade de traballar, 15 non atopan emprego. No seu conxunto, Galiza suma xa un total de 200.600 parados. No último ano, anotáronse nas listas do desemprego un total de 37.900 persoas (32.200 só nos últimos tres meses).

Nas análises máis miúdas da estatística, hai que subliñar que a taxa de paro feminino é case dous puntos superior á masculina, cun 16,50% fronte ao 14,58% dos homes. Tamén Galiza rexistrou o maior descenso na taxa de ocupación, con 41.800 ocupados menos, e a taxa de actividade máis baixa, despois de Asturias e Estremadura, cun 54,41%.

Podes ler en Vieiros a información dos últimos meses:

• Última EPA, en xaneiro: A taxa de desemprego achégase ao 13%
• Marzo: O desemprego continúa a súa escalada por enriba das cifras estatais
• Febreiro: O mes de febreiro deixa 2.500 novos parados no país
• Xaneiro: O paro segue subindo en Galiza a maior ritmo que no Estado
• Novembro: O paro increméntase en Galiza case o dobre que no Estado

• Análise: Que pode facer a Xunta ante o incremento do paro?