Vieiros

"Clarificando a fase política e a estratexia" é o título do documento que guía o debate interno en Euskadi entre as bases da esquerda abertzale. Un texto do que nas últimas semanas se foran coñecendo diversos extractos e que agora pode xa consultarse integramente en internet. A proposta sae á luz logo de que fosen detidos recentemente parte importante dos líderes políticos chamados, con probabilidade, a ter importante protagonismo no novo proceso en preparación.

A análise contén significativas chamadas á retirada do protagonismo á ETA en favor da saída á luz e a consolidación de propostas políticas sólidas. Entre outros, indícase por exemplo que o proceso democrático "é unha acción política xeral que ten como obxectivo a acumulación de forzas para o cambio político". "Non é só unha liña de traballo, senón a columna que sostén a estratexia independentista", expón o documento, subliñando como fundamental que teña como base "a palabra e a decisión da cidadanía". De xeito destacado á luz do acontecido durante a anterior cesamento de fogo da ETA, expoñen ademais que o camiño en proceso "non debe subxugarse" á negociación, de xeito que no estremo de que esa negociación "estea bloqueada polo Estado", o proceso debera continuar "dando pasos cara a acumulación de forzas e a construción nacional".

• Dosier en Gara: Iniciativa da Esquerda Abertzale
• Diario Vasco: Aralar atoparase "no camiño" coa esquerda abertzale