Vieiros

19 partidos dispútanse esta cuarta feira en Holanda os 150 escanos da cámara baixa nunhas eleccións anticipadas centradas na crise económica fronte ao sempre mediático debate sobre a inmigración do que tenta botar proveito a extrema dereita.

As sondaxes auguran a vitoria dos liberais de centro dereita do VVD e a caída do partido do actual primeiro ministro, o conservador do CDA, Jan-Peter Balkenende. De se confirmar, Mark Rutte converteríase no primeiro ministro dun país que viu caer as últimas catro coalicións de goberno.

A última crise, que provocou a convocatoria de eleccións anticipadas, produciuse o pasado 20 de febreiro. O Partido do Traballo (PvdA, socialdemócrata) anunciou a súa saída do executivo da Haia por se negar a secundar a proposta do primeiro ministro Balkenende de enviar máis tropas a Afganistán.

Desde aquelas o dirixente conservador perdeu fol, mais non precisamente pola guerra de Afganistán -que practicamente pasou sen pena nin gloria pola campaña electoral- senón pola situación económica, aínda que o 4% de paro está lonxe do case que 20% no Estado español.

Sondaxes
As últimas sondaxes depáranlle unha forte caída. Dos actuais 41 escanos ficarían con apenas 21-22 asentos, pasando a ser terceira forza. Os de Ruttechimparían chimparían de 21 asentos a 36 grazas á súa mensaxe, ben acollida, de austeridade económica: reducir en 20 mil millóns o gasto público, deixar na metade o número de ministerios e elevar a idade de xubilación dos 65 aos 67 anos.

Pola súa banda, o PvdA podería obter 28-29 escanos (actualmente conta con 33). Da caída dos dous partidos da coalición, os demócrata-cristiáns e os socialdemócratas, tirará proveito tamén a extrema dereita do xenófobo Geert Wilders. O líder do Partido pola Liberdade (PVV) podería ser chave de goberno de se cumprir o prognóstico das sondaxes que lle dan o dobre dos nove asentos actuais.