Vieiros

En Galiza temos actualmente 144 persoas cotizando por cada 100 pensionistas, unha media moi inferior á do Estado Español (onde o número de cotizantes se eleva até 216) e que deparan unha media de 26 pensionistas por cada 100 cidadáns. Así o revela un informe presentado polo gabinete económico de Comisións Obreiras (CCOO) que se fixo público baixo o título de “O sistema público de pensións en Galiza”.

Pensións máis baixas
Alén do número de galegos que recibe unha prestación, é salientábel outro dato do que temos constancia mes a mes: o importe medio das pensións galegas segue a situarse na cola do Estado e moi por debaixo da media española (125 euros menos, é dicir, un 16% menos): mentres un galego percibe de media 629 euros ao mes, a media estatal dun pensionista ascende até 754 euros. Se ben o feito de que Galiza ocupe a última posición no listado das comunidades autónomas non é novidoso, si o é a tendencia dos últimos anos: O diferencial negativo medrou nos últimos 20 anos e segue incrementándose mes a mes.

Máis pensionistas
Asemade, medrou tamén cos anos o número de persoas en situación de percibir unha pensión: actualmente, nove de cada 100 pensións do Estado Español son percibidas en Galiza (onde reside o 6% da poboación total do Estado). O ano pasado, recibiron unha paga contributiva unha media de 714.900 persoas, o que supón un crecemento do 29% nos últimos 20 anos (cando a poboación só medrou un dous por cento).

Poucos traballadores para tantos xubilados
As pensións galegas do Réxime Xeral supoñen o 6% do total das de todo o Estado; as do Réxime Agrario o 35%; as do Réxime do Mar, o 39%; e as do Réxime de Autónomos, o 7,4%. As diferencias entre traballadores, polo tanto cotizantes, e pensionistas son especialmente preocupantes en algúns sectores. Por exemplo, os autónomos sumaron o ano pasado 236.438 traballadores fronte a 294.126 pensionistas; no caso dos traballadores do mar houbo un total de 25.460 cotizantes e 51.289 pensionistas; e no eido do agro, houbo outros 4.472 cotizantes e 6.178 xubilados.

Economía somerxida
Segundo CCOO a economía somerxida en Galiza podería ser catro ou cinco puntos superior á do Estado Español, polo que representaría un 30% do PIB, fronte a unha media do 10 ao 15% dos países da Unión Europea.O sindicato entende que facer emerxer estes “traballos en negro” para que paguen as súas cotizacións sería fundamental para garantir o futuro das pensións. Destaca a necesidade de proceder a controis máis estritos sobre a fiscalización, a contratación laboral e a fraude ao sistema de Seguridade Social, de xeito que as cotizacións se correspondan cos salarios reais.

• Podes ler aquí o informe completo: "O sistema público de pensións en Galiza" (CCOO)