Vieiros

A Marcelino Fernández Mallo tócalle defender este martes a súa segunda novela: Klásicos. Acompañado do articulista Rafael Cuíña e do escritor Francisco Fernández Naval, o autor dará a coñecer a súa última obra en Compostela (Libraría Couceiro, 20 horas).

O libro, publicado por Morgante (selo de Rinoceronte), transita polos camiños da crítica social e do humor negro. Desta volta, Fernández Mallo lévanos a unha viaxe ao corazón das nosas elites urbanas. Horacio, o protagonista da historia, leva a vida disipada que lle permite o moito diñeiro e a súa xuventude. Pero un accidente doméstico muda radicalmente a súa acomodada existencia.

O autor debuxa unha “historia sobre a estupidez humana. E sobre a capacidade de resistencia e rexeneración das familias hexemónicas”. Case nada, e todo pasado pola batedora do humor máis acedo.