Vieiros

O voceiro do PPdeG, Antonio Rodríguez Miranda, asegura que os cen primeiros días do seu xefe de filas, Alberto Núñez Feijoo, confirman o "cambio de rumbo político" en Galiza despois dunha lexislatura de Goberno bipartito, "marcada polo despilfarro". "Desprenderse do 'supercoche' de Touriño foi o primeiro símbolo do cambio, aínda que non o máis importante", indicou en declaracións a Europa Press.

Na mesma liña, Rodríguez Miranda identificou esta primeira etapa de Feijoo á fronte da Xunta co "aumento das liberdades e da rexeneración democrática". Como exemplo, aludiu á consulta do galego no ensino ou á reforma da Lei de Función Pública, para que os opositores elixan o idioma no que realizan os seus exames.

Do mesmo xeito, o voceiro popular felicitou o novo xefe do Executivo por lograr que Galiza "sexa respectada" en Madrid e teña "máis peso". "Feijoo traballa con firmeza e con lealdade institucional", sinalou Rodríguez Miranda e referiuse á negociación do novo modelo de financiamento autonómico.

Tamén subliñou os avances "rexistrados" no que respecta ao cumprimento de promesas electorais e criticou a oposición por esixirlle á nova Xunta "que faga en catro días o que eles non fixeron en catro anos". Como grandes retos pendentes para o novo Goberno, o dirixente popular referiuse a "superar" a crise económica, aínda que asegurou que "xa se canalizou o camiño" para logralo. Neste contexto, Rodríguez Miranda resaltou a aposta de Feijoo por "impulsar" o Xacobeo 2010, como un instrumento "indispensábel" para reflotar a economía.



Estatuto Con respecto á reforma do Estatuto, ratificou a intención de Feijoo de remitir unha proposta á Cámara nesta lexislatura e resaltou que nos Gobernos do PP "sempre se avanzou moito en materia de autogoberno". "Co bipartito, non tanto, malia as súas proclamas", engadiu. Neste escenario, Rodríguez Miranda apostou por traballar "sen présa pero sen pausa" para articular un novo texto que sirva para "mellorar a calidade de vida dos galegos". "A norma debe estar para iso, non para responder a intereses partidistas", concluíu.