Vieiros

Líderes de varias relixións diferentes tentarán que os concursantes ateos do programa da TV turca Tovbekarlar Yarisiyor (Competición de Penitentes) se convertan á fe que profesan. O obxectivo é que polo menos un dos dez participantes en cada episodio, como Saulo, 'caia do cabalo'.

Os que o fagan gañaran unha peregrinaxe espiritual gratuíta ao lugar santo da nova relixión escollida. Os musulmáns viaxarán á Meca. Os xudeus e os cristiáns, a Xerusalén. E os budistas, ao Tíbet informa a prensa inglesa.

Na súa promoción, o show televisivo promete que os conversos gañarán tamén "serenidade" e "o maior premio da historia ... crer en Deus". Os produtores agardan que o programa, previsto para setembro, promova as crenzas relixiosas e eduque a maioría musulmá do país sobre outras fes.

O concurso está estritamente limitado aos non crentes e os participantes deberán pasar un exame previo ante un comisión de oito teólogos. Ademais, os conversos serán vixiados para confirmar que a transformación é xenuína e non un calote.