Vieiros

Será a partir do ano que ven. Os inmigrantes que así o desexen poderán tomar parte nun curso de integración social, no que recibirán información non só sobre os seus dereitos, deberes ou sobre o funcionamento do mercado laboral, senón tamén sobre a lingua e a cultura catalás. Este seminario será de balde e voluntario e, segundo a titular do Departament d'Acció Social i Ciutadania, Carme Capdevila, "servirá para demostrar o arraigo no país". Do mesmo xeito adiantou que o Govern negociará co executivo central para que ese documento sexa tido en conta para facilitar a obtención de papeis de residencia e outros procesos de estranxeiría.

Na actualidade, cada concello decide os mecanismos a empregar para integrar aos estranxeiros e que é o necesario para outorgarlles o certificado de arraigo que solicita o Estado para regularizar a súa situación. O obxectivo é que, con esta lei, se unifiquen as actuacións en todo o territorio. Cun orzamento de 34 millóns de euros crearanse 11.700 cursos de catalán, a lingua que "guiará todo o proceso de acollida", segundo Capdevila. Do mesmo xeito engadiu que, unha vez que se acrediten competencias básicas no primeiro idioma, poderían darse tamén clases de castelán.