Vieiros

Parece que as do 1 de marzo serán as primeiras eleccións no país nas que a internet teña especial importancia, cando menos á hora de facer campaña. E, como é a moda, os líderes políticos están a facer uso das redes sociais. A última nova que chega do gabinete de prensa do candidato do PPdeG, Alberto Núñez Feijoo, asegura que xa superou os mil amigos no Facebook.

Porén, no momento de redactar esta información, o candidato aínda non rebasa a redonda cifra, e queda en 993. Ademais, asegúrase que é “o político galego con máis amigos virtuais de cantos se presentan ás eleccións galegas”, cando Emilio Pérez Touriño, do PSdeG, ten exactamente as mesmas amizades: 993.

O PPdeG considera que o número de amigos demostra “que os usuarios de internet” lle recoñecen a súa aposta polo uso das novas tecnoloxías para achegar a mensaxe do partido. Porén, ter moitos amigos en Facebook non equivale directamente a ter moitos votantes, e menos aínda se boa parte deles son militantes do partido en diversas áreas do Estado Español.

O papel cibernético de Feijoo é destacado pola súa formación polo feito de que impulsou unha web moderna e actual do PPdeG, máis unha páxina persoal que alberga a súa canle televisiva, Feijoo.tv. Precisamente esta última modalidade de contacto co electorado foi a que escolleu o candidato do BNG, Anxo Quintana, que se adiantou coa creación de Quin.tv.

Volvendo ao Partido Popular de Galicia, tamén conta cunha canle dedicada en YouTube, 20 dos seus dirixentes dispoñen de cadanseu blog e ten presenza en Facebook, Tuenti e Flickr. Toda a maquinaria está en marcha de cara o 1 de marzo.