Vieiros

Un dos xeitos máis efectivos de aprender é facelo xogando. E este parece ser o que pensaron os responsábeis da Confederación de Empresarios de Galicia (CEG). O venres 14 desenvolverán en Compostela un obradoiro de creatividade para emprendedores usando a metodoloxía do famoso xogo de construción Lego.

O denominado Lego Serious Play servirá, desta volta, para aprender a construír a identidade do espírito emprendedor, identificar as fortalezas e debilidades dos participantes e as dificultades que poden atopar no proceso de emprendemento.

O orixinal obradoiro está dirixido a persoas tituladas recentemente, responsábeis de pemes que aspiren a redefinir o seu negocio, axentes de emprego, emigrantes retornados e inmigrantes ou traballadores por conta allea que desexen cambiar a súa vida e optar polo autoemprego.