Vieiros

O Centro Coreográfico Galego (CCG) e a compañía Daniel Abreu estrean o vindeiro venres 18 ás 22.00 horas no Teatro Ensalle de Vigo (Rúa Chile, 15) o espectáculo Negro, primeira proposta do plan de coproducións do CCG para actual temporada, na que se presenta un traballo intimista dirixido polo coreógrafo canario e interpretado por el mesmo xunto a tres bailarinas galegas. A peza, que permanecerá na sala viguesa toda a fin de semana, exhibirase tamén no Salón Teatro de Santiago de Compostela os próximos 26 e 27 de xaneiro.

Con Negro, o Centro Coreográfico Galego, a unidade para a promoción da danza da Consellaría de Cultura e Deporte, continúa coa liña aberta o pasado ano de apoio á materialización de proxectos coreográficos xurdidos a iniciativa de profesionais procedentes de compañías privadas.

Negro está dirixido e coreografiado por Daniel Abreu, quen tamén forma parte da interpretación desta peza xunto ás bailarinas galegas, afincadas en Madrid, Andrea Quintana, Janet Novas e Anuska Alonso. O traballo fundaméntase no corpo como único instrumento motor de toda sensación. Bailarín e coreógrafo de gran talento, Daniel Abreu traballou para compañías como Provisional Danza ou Matarile Teatro. Foi asistente de dirección de Ana Vallés e Carmen Werner en Mi pie izquierdo e asistente de coreográfia da ópera Macbeth no Teatro Real. Obtivo o Premio do Xurado no XVIII Certamen Coreográfico de Madrid, xunto a Mónica García.