Vieiros

O 2007 foi un ano de aprendizaxe para a industria musical galega: participou por primeira vez en tres grandes mercados internacionais (o Midem de Cannes, o Popkomm de Berlín e agora a Womex en Sevilla). Tamén estivo presente mediante un stand de seu e baixo unha imaxe de marca consolidada, Galiciantunes. Boas condicións para daren un salto cualitativo para o ano.

A Fábrica de Chocolate, Abada, Berrogüetto Producións, Falcatruada, Lonxa Cultural, Nordesía, Ouvirmos, Deica Management, Iabadabadú Festicultores, Nalgures, Promociones sin Fronteras e Zouma Records seguirán a amosar os seus produtos en Womex até o domingo 28. E na noite deste venres, a voz de Ugia Pedreira soará na carpa Offwomex, arroupada polo resto dos integrantes de Marful: Pedro Pascual (acordeón diatónico), Pablo Pascual (clarinete baixo) e Marcos Teira (guitarra).

O encontro foi un adianto á reunión que a Consellaría de Cultura e Deporte manterá no IGAEM a principios de novembro coas empresas do sector en Galiza: o programa de traballo para o 2008, a amplicación da asistencia a eventos internacionais do mercado latino-americano, e a reivindicación dunha música con identidade a través da marca GalicianTunes son os principais puntos da orde do día. Tamén se estudará a posibilidade de promover conxuntamente os festivais galegos, e analizarase o estado das axudas para a promoción exterior en festivais ou a produción de novidades discográficas.