Vieiros

“Agardamos que a comunidade internacional non se deixe enganar” sinalou este domingo Ólmert en referencia á petición que realizaba o novo Goberno de unidade palestina para que finalizase o bloqueo internacional sobre as súas institucións.

O primeiro ministro israelita pediu que se manteña a liña de conduta que se adoptou para illar a un executivo “que non acepta os principios do Cuarteto” de Madrid: o recoñecemento de Israel e dos acordos firmados pola OLP e a renuncia á violencia terrorista.

Malia isto, Ólmert non descarta o diálogo co presidente da Autoridade Palestina, Mahmud Abbas, aínda que matiza que os contactos estarían limitados por mor da presenza de Hamás na coalición palestina.

Segundo o dirixente israelita, “non podemos ter contacto co goberno e os seus ministros xa que este non está a aceptar as condicións da comunidade internacional e ve o terror como un método lexítimo para acadar os seus obxectivos”.